سترة زرقاء لسجين وعامل وبحّار

-4-

في حياة تانية، كنت بحَّار عادي من اللي بيغسلوا سطح المركب أو يساعدوا في المطبخ ويلمُّوا الصحون من على الترابيزات. 

بس برضه كنت بتفسَّح وأشوف الدنيا، وفي كل مينا كان لي أجازة، وآخر الليل بشرب لمَّا ببقى طينة ويسحبوني معاهم على المركب.

وفي كل مرة كنت براهن إني أكسب في المصارعة اللي بتفرَّج عليها، كل مرة أنا والمُصارع اللي خسر بنرجع آخر الليل خسرانين، بس هو خسارته طافحة دم على وشُّه ومورَّمة جسمه، وأنا خسارتي مجرَّحة روحي.

--<>--<>--<>--<>--<>--<>--

زي مراكبي عطَّلته النوَّة عن ركوب البحر، راح وقعد على القهوة الصبح وهو بيفكَّر بكرة الجو يهدا والدنيا تروق، فيه رب في السما ورزق في البحر، إيده بس وهو بيشرب الشاي اتهزِّت زي ما يكون على المركب.

كنت قاعد على قهوة صيَّادين، وكانوا بيحضَّروا لرحلة صيد طويلة وبعيدة، وعندهم أمل يرجعوا منها بصيد كتير.

كانوا بيتكلِّموا ويتخانقوا على كل حاجة: المركب والأكل والشرب والعدَّة والرجَّالة، وكان فيه كلام عن إن الجو ممكن يقلب بنوَّة، وإن ده ممكن يكون خطر على مركبهم ورحلتهم.

كانوا بيجهِّزوا كل حاجة، وبيعملوا حساب كل حاجة، حتى خوفهم من النوَّة كانوا بيجهِّزوا ليه مكان على المركب وفي روحهم كمان.

كنت قاعد مشغول بيهم وبرحلتهم وبمركبهم وبالصيد اللي هيرجعوا بيه وبخوفهم من النوَّة.

كان نفسي أقول لهم خدوني معاكم حمولة زايدة من الخوف من نوَّة على الأرض، أنا اللي عمري ما ركبت البحر.

-5-

أنا لا أُحبُّ البحر

ولا أحلم أن أكون بحَّارًا

لكن هذا لا يمنعني

أن أركب سفينة تغرق

إلى الجهة الأخرى

من العالم