سنتر الشرق هوي الاصعب
سنتر الغرب هوي تمنطق
بتعيش طريقك مربط... وانت ابسط
...بتعد خيوطك... بتُربط شروقك مع غياب غروبك... بتشيل حظك من مساحة رفوفك ... بتنفض تيابك من غبرة حروفك
فهل من اغرب ؟
طيب الاخلاق لازم تكون سياسة ... وانت بحالك اعرف
لا تكذب ...لا تقتل ... بعد في شي اعجب ؟
روح امشي ع تراب سهولك... لقوط زرعك من تم الارعب
"...لا تقلي الدني واقع ... والحقيقة بطنجرة و "الله... واكبر
ما الرب مات لما شاف انك ع شعر اختك مربط
عاف عيوبو ... من لما كان عيبك ع سكون عيوبك اشرف
لا تقلي ما في خط ... ما خطوطك ع خطوطي بملعب
خطين بالتوازي ...ما بيلتقو... هايك انت
يمكن... ويمكن لجهلك ع جهلك عم تلعب...
ف ما تربح ما تضحك ... لانو العقدة بروحك عم تتربط
مش صعبة... ومش هينة،... كرمال هيك النبي كان ملبك
ولا مرة كان عندو جواب شافي... عطول عم يجتهد حسب الواقع مربع
اجو بعدو صاغو الحديث.... وكل شي بشد عمشدو "اقدس...
طيب شيلنا من النبوة.... تعا نروح عالغابة نلعب
شايف طول الشجرة ؟ من هاون اجا المرفأ
شايف الارض شو تراب ؟ اي من هاون اجا المطلب
ان كنت فهمان الطلاسم فوق ف يلا ... هيا بنا نتشعب
وان كنت بعدك غفلان لا توعى وتجي ع شرودي تتفصحن
فتش بعيون التعبان وقلو... من ماذا سوف نتعب
ما الكرة الارضية مبرومة وزحل بفلكها عم يتأرنب
والعيون ما بتكذب ..،بحلق فيها وكون انت الاوجب
تواصل مع غيرك لانو غيرك لحالك اشرح
شيل اسداس ضروب ب اخماس ....وقول العشوائي اصوب
...ما تقطف عنبي من بستاني وتقلي الحب مهرب
الحب يا صديقي هوي خُصلة بصحن مدور وبنات افكار تعبانة هربانة ...جوعانة للحق وانت ابعد....فهل نحنا اقرب...؟
الحب يا صديقي انك تعطي
الحب يا صديقي انك تنطر
الحب ارض ...وهوا...وماي ....ونار... وكلنا ب الاربع جهات نتقرب
فيا وقت خدلك استراحة وتعا صوبنا نحنا الاطرب
ويا عقل خدلك رحلة ...صوب بيوتنا...صوب همومنا ...نحنا الاوسع
ما خلِص هاون الكلام ... منكمل لما يصير المصير مُصِر يتبسط ... ويصير القلب للعقل وبنات ارضو منبت
حمزة شمص
حمزة شمص فنان بصري ولد في ريف بعلبك ، انهى دراسته الجامعية في معهد الفنون الجميلة بيروت في قسم السينما عام ٢٠١١-٢٠١٢، بدآ عام ٢٠١٤-٢٠١٥ بانتاج سلسلة مستقلة من الفيديوهات اسمها النمل.الاخوت وهي عبارة عن سرد بصري لعدة مواضيع متفارقة بين الريف والمدينة، في اب عام ٢٠١٧ اطلق مبادرة لجمع الكتب وفتح مكتبة لاولاد وشبان وشابات قريته وذلك بهدف جعل المعرفة متاحة للجميع وان لا تظل حكرا على العواصم حيث استطاع ان يجمع حوالي ٢٠٠٠ كتاب ومجموعة من الافلام والالعاب اليدوية، بدآ مشروع المكتبة يتطور ليصبح العمل مع الاصدقاء على جعل المكتبة مساحة حرة ومفتوحة تتيح وتنتج وتشارك المعرفة مع الجميع
